കേന്ദ്രമന്ത്രിയും എംപിയുമായ സുരേഷ് ഗോപിയെ കാണാനില്ലെന്ന് പോലീസില് പരാതി. കെ.എസ്.യു. തൃശ്ശൂർ ജില്ലാ പ്രസിഡന്റ് ഗോകുല് ഗുരുവായൂരാണ് സുരേഷ് ഗോപിയെ കാണാനില്ലെന്ന് തൃശ്ശൂർ ഈസ്റ്റ് പോലീസില് പരാതി നല്കിയത്.ഇമെയില് വഴിയാണ് ഗോകുല് പോലീസിന് പരാതി നല്കിയിട്ടുള്ളത്.
ഛത്തീസ്ഗഢില് കന്യാസ്ത്രീകളുടെ അറസ്റ്റിന്ശേഷം സുരേഷ് ഗോപിയെ കാണാനില്ലെന്നും സുരേഷ് ഗോപിയുടെ തിരോധാനത്തിന് പിന്നില് ആരാണെന്ന് കണ്ടെത്തണമെന്നുമാണ് പരാതിയില് പറയുന്നത്. കന്യാസ്ത്രീകളുടെ അറസ്റ്റുമായി ബന്ധപ്പെട്ട വിഷയത്തില് സുരേഷ് ഗോപി പ്രതികരിക്കാത്തതിനെതിരേ വിമർശനം ഉയരുന്ന പശ്ചാത്തലത്തിലാണ് പരാതി.കന്യാസ്ത്രീകളുടെ അറസ്റ്റില് ബിജെപിക്കെതിരേ സഭാനേതാക്കളില്നിന്നടക്കം വലിയ വിമർശനമുണ്ടായിരുന്നു. വിഷയത്തില് സുരേഷ് ഗോപി മൗനം പാലിച്ചതില് സഭാപ്രവർത്തകർക്കിടയിലും നീരസമുണ്ടായിരുന്നു. ഇതിനിടെ സുരേഷ് ഗോപിയെ പരോക്ഷമായി പരിഹസിച്ച് ഓർത്തഡോക്സ് സഭാ തൃശ്ശൂർ ഭദ്രാസനാധിപൻ യൂഹാനോൻ മാർ മിലിത്തിയോസ് മെത്രാപ്പോലീത്തയും രംഗത്തെത്തി. ഞങ്ങള് തൃശ്ശൂരുകാർ തിരഞ്ഞെടുത്ത് ഡല്ഹിയിലേക്ക് അയച്ച ഒരു നടനെ കാണാനില്ലെന്നും പോലീസില് അറിയിക്കണമോ എന്നാണ് ആശങ്കയെന്നും അദ്ദേഹം ഫെയ്സ്ബുക്കില് കുറിച്ചിരുന്നു.
