ന്യൂയോർക്ക്: ഇറാനുമായി അമേരിക്കൻ പ്രതിനിധികൾ ഉണ്ടാക്കിയ കരാറിൽ അമേരിക്കൻ പ്രസിഡൻ്റ് ഡോണൾഡ് ട്രംപ് ‘നിരവധി ഭേദഗതികൾ’ ആവശ്യപ്പെട്ടതായി റിപ്പോർട്ട്. വെള്ളിയാഴ്ച നടന്ന സിറ്റുവേഷൻ റൂം മീറ്റിംഗിലാണ് ട്രംപ് ഇത്തരം ആവശ്യം ഉന്നയിച്ചതെന്നാണ് ഉദ്യോഗസ്ഥരെ ഉദ്ധരിച്ച് യുഎസ് വാർത്താ ഏജൻസി ആക്സിയോസ് റിപ്പോർട്ട് ചെയ്യുന്നത്. ഇറാന്റെ ആണവ പദ്ധതിയെക്കുറിച്ചുള്ള വ്യവസ്ഥകൾ ഭേദഗതി ചെയ്യാൻ യുഎസ് പ്രസിഡന്റ് തൻ്റെ സംഘത്തോട് ആവശ്യപ്പെട്ടുവെന്നാണ് റിപ്പോർട്ട്. ഹോർമുസ് കടലിടുക്ക് വീണ്ടും തുറക്കുന്നതുമായി ബന്ധപ്പെട്ട് കരാറിലെ ഭാഷ മാറ്റാനും ട്രംപ് ആവശ്യപ്പെട്ടു. ഇറാന്റെ പ്രതികരണത്തിന് മൂന്ന് ദിവസമെടുക്കുമെന്നും ആക്സിയോസ് റിപ്പോർട്ട് ചെയ്യുന്നുണ്ട്.

ഇതിനിടെ ഇറാനുമായി സമാധാന കരാറിലെത്താൻ തനിക്ക് തിടുക്കമില്ലെന്ന് വ്യക്തമാക്കി അമേരിക്കൻ പ്രസിഡൻ്റ് ഡോണൾഡ് ട്രംപ്. യുഎസ് ഒരു ‘വലിയ കരാർ’ ഉണ്ടാക്കാൻ പോകുകയാണെന്നും ഇല്ലെങ്കിൽ ഞങ്ങൾ തിരികെ പോയി അത് സൈനികമായി അവസാനിപ്പിക്കുമെന്നുമാണ് ട്രംപിനെ ഉദ്ധരിച്ച് ഫോക്സ് ന്യൂസ് റിപ്പോർട്ട് ചെയ്യുന്നത്. കരാർ ഒപ്പിട്ടാൽ ധാരാളം ജീവൻ രക്ഷിക്കാൻ കഴിയുമെന്നും കരാറിൽ ഒപ്പിട്ടാൽ ഉടൻ തന്നെ ഹോർമൂസ് കടലിടുക്ക് തുറക്കാൻ കഴിയുമെന്നും ട്രംപ് വ്യക്തമാക്കി.ഇറാന്റെ നേതൃത്വത്തെ ‘വളരെ കഠിനമായ ചർച്ചക്കാർ’ എന്ന് വിശേഷിപ്പിച്ച ട്രംപ് അമേരിക്ക ആഗ്രഹിക്കുന്നത് പതുക്കെ നേടുന്നുണ്ടെന്നും വ്യക്തമാക്കി. നടന്നുകൊണ്ടിരിക്കുന്ന ചർച്ചകൾ പരാജയപ്പെട്ടാൽ ഇറാനെതിരായ ആക്രമണം പുനരാരംഭിക്കാൻ വാഷിംഗ്ടൺ തയ്യാറാണെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്‌സെത്ത് നേരത്തെ മുന്നറിയിപ്പ് നൽകിയിരുന്നു.

‘ഇതിന് വളരെ സമയമെടുക്കും. എനിക്ക് തിടുക്കമില്ല. നിങ്ങൾ തിരക്കിലാണെങ്കിൽ, നിങ്ങൾ ഒരു നല്ല കരാർ ഉണ്ടാക്കാൻ പോകുന്നില്ല. പതുക്കെ പക്ഷേ തീർച്ചയായും, നമുക്ക് വേണ്ടത് ലഭിക്കുന്നു, എനിക്ക് തോന്നുന്നത്, നമുക്ക് വേണ്ടത് ലഭിച്ചില്ലെങ്കിൽ, നമ്മൾ അത് വ്യത്യസ്തമായ രീതിയിൽ അവസാനിപ്പിക്കും’ എന്നായിരുന്നു ഡോണൾഡ‍് ട്രംപിൻ്റെ പ്രതികരണം.

ഇറാഖിനെതിരായ അമേരിക്കയുടെ യുദ്ധത്തെക്കുറിച്ചും ട്രംപ് പരാമർശിച്ചു. ‘ഇറാഖിൽ എന്താണ് സംഭവിച്ചതെന്ന് നിങ്ങൾ നോക്കൂ. ഞങ്ങൾ വളരെ മോശമായി പ്രവർത്തിച്ചു. ഞങ്ങൾ ചെയ്തത് വളരെ മണ്ടത്തരമായിരുന്നു. ആദ്യം തന്നെ ഞങ്ങൾ അവിടെ ഉണ്ടാകരുതായിരുന്നു’ എന്നാണ് ട്രംപിൻ്റെ പ്രതികരണം. ഇറാനിൽ നടത്തിയ ആക്രമണത്തെയും ട്രംപ് ന്യായീകരിച്ചു. ‘ഒൻപത് മാസം മുമ്പ് ഞങ്ങൾ B-2 ബോംബറുകൾ ഉപയോഗിച്ച് ആക്രമിച്ചില്ലെങ്കിൽ അവർക്ക് ഇപ്പോൾ ഒരു ആണവായുധം ഉണ്ടായിരിക്കുമായിരുന്നു. അത് തികച്ചും വ്യത്യസ്തമായ ഒരു കഥയായേനെ, നിങ്ങൾക്ക് ഇസ്രായേൽ ഉണ്ടാകുമായിരുന്നില്ല, പക്ഷേ നിങ്ങൾക്ക് ഒരു മിഡിൽ ഈസ്റ്റ് ഉണ്ടാകുമായിരുന്നില്ല, പിന്നെ അവർ അവിടെ നിന്ന് എവിടേക്ക് പോകും’ എന്നായിരുന്നു ട്രംപിൻ്റെ പ്രതികരണം.

ഇറാനിയൻ സൈന്യത്തെ യുഎസ് മനഃപൂർവ്വം ഒഴിവാക്കിയെന്നും ട്രംപ് അവകാശപ്പെട്ടു. ഇറാൻ്റെ സൈന്യം അൽപ്പം മിതവാദികളാണെന്ന് കരുതുന്നതിനാൽ അവരെ വെറുതെ വിട്ടു എന്നായിരുന്നു ട്രംപിൻ്റെ പ്രതികരണം. ‘മിതവാദികളല്ലാത്ത മറ്റ് ആളുകളും അവർക്കുണ്ട്. ഞങ്ങൾ അവരെ ഒഴിവാക്കി. വ്യത്യസ്ത തരത്തിലുള്ള നേതൃത്വത്തെ ഞങ്ങൾ എടുത്തു. യഥാർത്ഥത്തിൽ അവരുടെ സൈന്യത്തെ ഞങ്ങൾ വെറുതെ വിട്ടു’ എന്നായിരുന്നു ട്രംപിന്റെ പ്രതികരണം.