കനത്ത മഴയെ തുടർന്ന് താമരശ്ശേരി ചുരത്തില് മണ്ണിടിച്ചില് തുടരുന്ന സാഹചര്യത്തില് ഇനിയൊരു അറിയിപ്പുണ്ടാകുന്നതു വരെ ഇതുവഴിയുള്ള ഗതാഗതം പൂർണമായും നിരോധിച്ചതായി ജില്ലാ കലക്ടർ സ്നേഹില് കുമാർ സിങ് അറിയിച്ചു.
ശക്തമായ മഴയില് കൂടുതല് പാറക്കഷ്ണങ്ങളും മണ്ണും റോഡിലേക്ക് വീഴുന്നത് തുടരുന്ന സാഹചര്യത്തിലാണിത്. ആംബുലൻസ് ഉള്പ്പെടെയുള്ള എമർജൻസി വാഹനങ്ങള് പോലീസിന്റെ അനുമതിയോടെ കടത്തിവിടും.
കുറ്റ്യാടി ചുരത്തിലും ഗതാഗതക്കുരുക്കിന് സാധ്യതയുള്ളതിനാല് ചുരംവഴിയുള്ള അത്യാവശ്യമല്ലാത്ത യാത്രകള് ഒഴിവാക്കണം. നിയന്ത്രണങ്ങളുമായി ജനങ്ങള് സഹകരിക്കണമെന്നും ജില്ലാകലക്ടർ അറിയിച്ചു. കോഴിക്കോട് കാവിലുംപാറ, മരുതോങ്കര മലയോര മേഖലകളില് ശക്തമായ മഴ തുടരുകയാണ്. തൊട്ടില്പ്പാലം പുഴയില് ഒഴുക്ക് വർധിച്ചിട്ടുള്ളതായും അറിയിപ്പുണ്ട്. കുറ്റ്യാടി ചുരത്തില് പക്രംതളത്തിന് സമീപം നേരിയ മണ്ണിടിച്ചല് ഉണ്ടായതായും അധികൃതർ അറിയിച്ചിട്ടുണ്ട്.
റോഡില്നിന്ന് മണ്ണ് നീക്കം ചെയ്യാനുള്ള പ്രവൃത്തികള് പുരോഗമിക്കുന്നുണ്ട്. താമരശ്ശേരി തഹസില്ദാർ സി. സുബൈർ ഉള്പ്പെടെയുള്ള റവന്യൂ ഉദ്യോഗസ്ഥരുടെ നേതൃത്വത്തില് പോലീസ്, ഫയർ ആന്റ് റെസ്ക്യൂ ഉള്പ്പെടെയുള്ള ഏജൻസികള് ഇതുമായി ബന്ധപ്പെട്ട പ്രവർത്തനങ്ങള് നല്ല രീതിയില് ഏകോപിപ്പിക്കുന്നുണ്ടെന്നും ജില്ലാ കലക്ടർ അറിയിച്ചു.
കോഴിക്കോട് ജില്ലാ ദുരന്ത നിവാരണ വിഭാഗം ഡെപ്യൂട്ടി കലക്ടർ എം. രേഖ, ഹസാഡ് അനലിസ്റ്റ് പി. അശ്വതി, ജില്ലാ സോയില് കണ്സർവേഷൻ ഓഫീസർ എം. രാജീവ്, അസിസ്റ്റന്റ് ജിയോളജിസ്റ്റ് ദീപ ഉള്പ്പെടെയുള്ള സംഘം ഇന്നലെ സംഭവസ്ഥലം സന്ദർശിക്കുകയും ആവശ്യമായ നടപടികള് നിർദ്ദേശിക്കുകയും ചെയ്തിട്ടുണ്ട്.
